Movie

Youthenasia

 Jinnah University for Women k Anwar Sultana Auditorium may 31^st October 2011 ko Shuba-e-Iblag-e-aama ki Taalibat ki janib say nojavano ko malomat ki frahmi k liye  “Youthenasia” k naam say aik seminar ka ineqad kiya gaya.Is seminar may nojavano may khud aetamadi barhany k liye mashor-o-maroof  shakhsiyat ko dawat di gayi take wo apne tajurbat aur waaqiyat taalibat say share kr saken.Seminar may Director of Finance DLI Ahmed Siddiqui, Sports women Fatima Batool, Anchor Faisal Qureshi, Actor Shagufta Ejaz, Director ARY News aur ARY One World Mazhar Abbas, First Women Journalist of Pakistan Shahida Qazi, Assistant Professor Dow University of Health Sciences Farhan Essa, Cricketer Sikandar Bakht aur VJ aur Actor Ali Safina ne shirkat ki.

Seminar ko 6mukhtalif hisson may taqseem kiya gaya tha jis may Naye mustaqbil ki taamir ki umeed, Business, Qayadat, Sahafat, Science aur khail-o-tafreeh shamil thay.Seminar k aakhir may students ne aik documentry film paish ki jis may mulk k halat-o-waqiyat aur dehshat gardi ko ujagar kiya gaya aur un say kesay nimta jaye k manazir paish kiye.Ye Seminar nojawano k liye aik mishal-e-raah sabit hoa.
Agenda of this Seminar:
You are the change...
"We can not always build the future for the youth but we can build our youth for the future"

Reporting of Debate Competition

Jinnah University for Women may Debating Society k zair-e-ehtemam,10 Oct 2011 ko Anwar Sultana Auditorium may aik taqriri moqabla monaqqid kya gaya jis may Karachi ki 15 Universities k tulbah-o-taalibat ne hissa liya.Taqreer ka mozu tha "Media Intishar Ka Zimmedar Hay",muqararen ne iske mawafiqat aur mukhalifat may dalail diye.Is taqreeb k mehman-e-khususi "Faisal Sabzwari" aur "Faisal Qureshi(Anchor)" thay,jinho ne hazreen ko apne khayalat say aagah kiya.Ye muqabla 11am say 6pm tak jari raha.

Is muqablay ka pehla inam Karachi University k talib "Naeem Saeed" ne hasil kiya,dosra inam Sir Syed University k talib "Umer Ufaq"ne hasil kiya aur teesra inam Indus Institute of Higher Education k talib "Hafiz Hamad Hussain" ne hasil kiya.

Survey

Halia semester ki ibtida ko do maah guzar chuke hain.Iske aagaz say hi halat kharab thay.Aik mah baad hi Ramzan ka mahina shuru ho gaya,uske baad Eid ki chuttiyan aur phir ab Mid Term.Ye tamam anasir parhai per kitne asar andaz hoye,mid term ki tayyari kesi hay aur sath hi sath VC Sahab ka haal hi may paish krda short attendance ka issue.In sub k bary may taalibat ki kya raye hay;ye jannay ki garz say university k mukhtalif shobon ki taalibat say unki raye pochi hay jiski report hasb-e-zail hay.

*Department of Computer Science,

  Student of BS 1st year

 Named Maryam(Assumed)

"Halat ki kharabi ki wajah say bohat say masail ka samna krna para hay,mid term ki tayyari mutassir hoi hay,attendance may kami halat hi ki wajah say hoi,agr thoray bohat jaghon k halat kharab hoon tab bhi class ho jaya krti thi bohat si larkiyan khas tor say van may aany wali larkiyan aa jaya krti thin jabke kafi sari nahi aa pati thin jis ki wajah say parhai ka bohat harj hoa hay.Hatta k Ramzan may bhi halat kharab rahay.Eid ki chuttiyon k baad mid term k liye time tu mila hay lekin iski fikar may Eid ko enjoy nahi kr saky.

VC Sahab ka short attendance ka issue bilcul theak hay kyun k baaz larkiyan bila wajah may bhi chuttiyan krti hain aur baaz agr aati bhi hain tu classes nahi letin;aesi larkiyon k liye ye faisla bilcul durast sabit hoga.Lekin jo larkiyan haqiqatan masail ka shikar ho jaya krti hainya jo khatarnak ilaqon say aati hain unke mamlay may reaayat baratni chahiye."

*Department of Economics

  Student of BS 1st year

 Named Zehra(Assumed)

 "Halat kharab honay ki wajah say parhai per bohat asar para hay kyun k uski wajah say chuttiyan bohat hoi hain.Albatta Ramzan aur Eid ki chuttiyon ki wajah say parhai per koi khas farq nahi para.Mid Term bilcul sahi waqt per ho rahay hain iski tayyari tu hay per wesi nahi hay jesi k honi chahiye thi kyun k shuru hi may parhai bohat mutassir ho gayi thi.

VC Sahab ka ye faisla bilcul durast hay isi tarah taalibat aayen gi warna ghar may bethi rahen gi aur imtihan day kr paas ho jaya karen gi."

*Department of English

 Student of M.A Previous

Named Sumaira

"Halat kharab honay k bais parhai bohat disturb hoi,chuttiyan bohat hoin.Van say aanay wali students aa jati thin tu class ho jaya krti thi jis say humara bohat nuqsan hota tha.Hum sub door door say garyan badal badal kr university aaty hain,halat ki kharabi k doran aana mumkin nahi hota tha,bus class fellows say kaam lay liya krtay thay.Ramzan aur Eid say koi masala nahi hoa.Mid Term apnay waqt per ho rahay hain aur ab tayyari bhi mukammal hay isliye k himari teachers bohat achi hain unhon ne humain sub kuch theak tarah say parhaya diya hay.

VC Sahab ye bohat bura kr rahay hain unka ye iqdam nehayat galat hay.Chuttiyan halat wagerah kharab ho jany ki wajah say ho jati hain warna humein koi shoq nahi hay apna qeemti waqt barbad krnay ka.Hum university may parhtay hain,samjhdar hain aur humein ye achi tarah maloom hay k humein kis tarah parhna hay.Ye tanaza sarasar galat hay isay bilcul nahi hona chahiye."

*Department of Biochemistry

 Student of  BS 1st year

 Named Tooba

"Semester ki ibtida hi say halaat kharab thay jis ki wajah say parhai bohat mutassir hoi hay.Transport band ho jaya krti thi,aas pass rehnay wali ya van say aanay wali taalibat aajaya krti thin tu class ho jati thi aur baqi larkiyon ki parhai ka bohat nuqsan hota tha.University may aik baat bohat galat hay k yahan kisi bhi cheez ki proper announcement nahi hoti hay,insan aakhir aakhir lamhay tak pareshan hi rehta hay.Baaz auqat tu itni pareshani utha kr university aao tab pata chalta hay k classes nahi hongi.Koi paigham koi itila mosol nahi hoti hay k humein baqaida message wagerah k zarye itila day di jaye.Aur ab aaj kal tu buses ka safar bhi mehfoz nahi raha jo larkiyan door door say aati hain unhen bohat pareshani ka samna krna parta hay;university ka koi point bhi nahi hay k jis say thori bohat saholat hasil ho.
Mid term apne schedule k mutabiq ho rahay hain humein iska ilm tha isliye koi pareshani nahi hay.Aadhi tayyari ho chuki hay aur baqi kr rahay hain.Short attendance ka issue bilcul sahi hay lekin bahir say aanay wali taalibat aur halat ki kharabi ki wajah say na aanay wali taalibat k mamlay may narmi baratni chahiye.

*Department of Urdu

 Student of Final year

 Named Shagufta.

"Sub say aeham baat tu ye hay k halat mustaqil kharab hain in halat may insan faisla nahi kr pa raha hay k wo kya kary aur kya nahi.Parhny ka zehan banatay hain university jany ka sochtay hain lekin mulk k halat ko dekh kr zehan bilcul pareshan ho jata hay,news may tarah tarah ki baatain sun kr dil itna kharab ho jata hay k dil chahta hay k parhai hi chor dain;kya faida aesi taleem ka jo humein shaor na de saky,aik dosray say hamdardi ka jazba na [aida kr saky.Haqiqatan is tarah k halat may taleem jari rakhna aur khas kr larkiyon ka taleem jari rakhna bohat mushkil aur sabraazma amal hay.Ghar may raho tu parhai ki fikar rehti hay,parhny k liye niklo tu ghar walay fikar mand rehtay hain jab tak wapis ghar na pohnch jaen unka dil hum hi may atka rehta hay.Is surat-e-haal may koi kesay apni taleem per tawajja de aur yaksoi say parh saky!

Ramzan k mahinay may parhai nahi ho pati,agr parhny may zyada dhiyan do tu ebadat may farq parta hay aur ye ibadat bhi aeham hoti hain jin say kinara krna ya un may gaflat baratna mumkin nahi hota hay.Eid ki chuttiyan sahi thin itni chuttiyan Eid ki tu honi chahiyen.In sub halat may bhi Mid term ki tayyari kisi tarah kr li hay.Humari teachers hum per bohat tawajja deti hain.parhai k mamlay may bohat sakht hain.humara sara kaam apni nigrani may krwati hainMid Term k hawalay say ye kehna hay k do maah baad mid term hoty hain sirf 20 numberon k aur phir do maah baad final 60 marks k aur sath assignments bhi,tu istarah parhai adam tawazun ka shikar ho jati hay;aik dam say boat sa bojh aa jata hay isliye ya tu mid term k marks barha diye jayen ya isko aik maah baad hi lay liya jaye take hum per itna pressure na rahay.

Short attendance ka issue bilcul sahi hay is tarah parhnay wali aur regular aany wali larkiyon k sath ziyadti hoti hay.Lekin aaj kal k halat may jo larkiyam majboran chutti krti hain aur normal halat may baqaida aati hain unka khayal krna chahiye.Aur aik aeham baat jo humari teachers ne batai hay k VC Sahab ka kehna hay k:'Ab papers KU say ban kr aaya karain ge aur wahin check honay jaya karain ge' iska abhi koi hatmi faisla tu nahi hoa lekin phir bhi VC Sahab ka ye khayal bilcul bhi durast nahi,is say talibat kafi pareshani aur uljhan ka shikar hain.Hum apni teachers say parhtay hain wo humary aur hum unke zehan say waqif hotay hain,humein parhaye koi aur paper le koi aur ye bilcul galat hay phir is say is University ka kya faida hay.Hum is iqdam say bohat zyada pareshan hain aur is fikar may humari parhai aur karkrdigi bhi mutassir ho rahi hay.VC Sahab say guzarish hay k wo istarah ka koi bhi faisla krnay say guraiz karen.Ye faisla taalibat k sath ziyadti aur teachers k haq may bhi sahi nahi.is say unki hosla shikni aur un may adam aetamadi paida hogi"

Picasa

Normal Picture:

In Picasa:

Normal Pics:

In Picasa:

Normal Pictures:

In Picasa:

Social Networking

Mojoda dour information aur technology ka dour hay.Aaj k is computerized dour may dunya simat kr hathon may aa gayi hay...kisi bhi cheez k bary may malomat hasil krna ho ya dunya k kisi bhi hissay may apna paigham pochana ho ye sub ab sirf chand lamhon ka kaam reh gaya hay.Insan ko hamesha say hi nit nayi cheezon k bary may jannay ka shoq raha hay,is shoq ki takmeel may computer aik nehayat aeham kirdar ada kr raha hay.

Social networking aik aesi term hay jis ka istemal humary liye aasodgi ka bais banta hay,is k zarye hum apne pyaron say hr lamha rabte may rehte hain,apni pasand ki cheezain dekhtay aur suntay hain,apni soch aur khayalat dosron say share krtay hain aur apni pasnd aur zarorat k logon say mail jol paida krtay hain.Social networking ki jo websites aam tor par meray istemal may rehti hay un may Facebook,Yahoo,Skype,Nimbuzz.Google aur YouTube shamil hain.In k zarye main apni friends aur family say rabte may rehti hoon,apne views,ideas aur interest share krti hoon aur apni pasand ki cheezain dekhti hoon.Social Networking ki bohat si websites hain jo humari zindagi ka hissa ban chuki hain aur humaray liye bohat ehmiyat ki hamil hain.